Hakbang ng DOJ at BuCor sa reporma ng correctional system suportado ni Sen. Erwin Tulfo

Nangako ng suporta si Senator-elect Erwin Tulfo sa Department of Justice (DOJ) at Bureau of Corrections (Bucor) para sa reporma ng correctional system sa bansa.

Kasunod ito nang pagbisita kahapon ng senador sa Minimum Security Compound ng New Bilibid Prison (NBP) sa Muntinlupa City kung saan sinabi niya sa mga opisyal ng BuCor sa pamumuno ni Director General Gregorio Pio P. Catapang Jr. na maghahain siya ng panukalang batas para sa unified penology and correctional system na magkasama ang Bureau of Jail Management and Penology (BJMP) at ng BuCor.

Ang iba pang batas na ipaprayoridad ni Tulfo ay ang abokasiya para sa pagpapalaya sa mga maysakit na senior citizens o nakatatandang inmates, na pagkilala sa mga hamon na kinakaharap sa penal system.

Tiniyak pa ng senador sa Bucor officials ang pagsasaayos ng kanilang budgetary requirements upang magkaroon ng kinakailangang upgrades sa mga pasilidad, mapagandahin ang staff training at makatulong ng access para sa inmates.

“Malapit sa puso ko ang mga PDLs dahil nung bata pa ako, ang tatay ko ay madalas maimbita ng kanyang kaibigan na official ng Bucor sa Iwahig, at madalas sinasama nya kami doon kung saan kami ay naliligo sa isang open dam at muntik na akong malunod pero ako po ang sinagip ng isang PDL, Kaya makakaasa kayo na ako ay tutulong sa inyo sa abot ng aking makakaya,” pahayag ni Tulfo.

Inihayag naman ni Catapang na ang ganitong mga pagsasaayos ay hindi lamang lohistikal kundi mahalagang pagpapabuti sa buhay ng persons deprived of liberty habang humaharap sa mga hamon gaya ng overcrowding, hindi sapat na resources, at lumang imprastraktura.

Ikinatuwa ng Bucor chief ang suportang ito ng senador at binigyang-diin ang kahalagahan ng kolaborasyon sa pagitan ng mga mambabatas at correctional institutions upang mapangalagaan ang kapaligiran para tiyaking maisisilbi ang katarungan at ang mga kulungan ay oportunidad ng reporma o pagbabago kaysa parusa. (Bhelle Gamboa)