2,923 pang PDLs pinalaya ng BuCor mula Apr. 1 hanggang June 11

Inanunsyo ni Bureau of Corrections (BuCor) Director General Gregorio Pio P. Catapang Jr. ang paglaya ng 2,923 na persons deprived of liberty (PDLs) magmula Abril 1 hanggang Hunyo 11 sa isinagawang culminating activity sa New Bilibid Prison (NBP) Compound sa Muntinlupa City ngayong araw.

Sa datos ng BuCor umabot na sa kabuuang 23,579 na PDLs ang napalaya sa ilalim ng administrasyon ni Pangulong Ferdinand R. Marcos Jr.

Pinasalamatan ni Catapang ang Kortes Suprema sa desisyon nitong lahat ng PDLs kasama ang mga nahatulan ng karumal-dumal na krimen ay kuwalipikado sa benepisyo ng Good Conduct Time Allowance (GCTA) na naging posible ng kanilang maagang paglaya.

Nabatid sa BuCor chief na ang uri ng pagpapalaya ng PDLs ay batay sa pagtapos ng sentensiya ng 2,373; absuwelto sa kaso ang 228; 212 ang nagkamit ng parole; 76 sa habeas corpus; 59 ang nabigyan ng probation; at tig-1 naman ang tinurn-over sa jail dahil sa ibang kaso at may nakabinbin na kaso.

Kabilang sa mga pinalaya ang 248 PDLs mula sa Correctional Institution for Women (CIW) sa Mandaluyong City, apat sa CIW Iwahig Prison and Penal Farm , 42 s CIW Mindanao, 469 sa Davao Prison and Penal Farm, 356 sa Iwahig Prison and Penal Farm, 134 sa Leyte Regional Prison, 1204 sa NBP, 180 sa Sablayan Prison and Penal Farm, at 313 iba pa galing ng San Ramon Prison and Penal Farm.

Sinabi ni Catapang na ang paglaya ng PDLs ay nagbigay-diin sa importanteng pagbago ng mga gabay na prinsipyo ng bansa tungo sa maayos na rehabilitasyon sa halip na parusa lang.

“By facilitating the reintegration of PDLs into society, the government not only helps these individuals reclaim their lives but also fosters safer communities. Proper reintegration programs can significantly reduce recidivism rates, allowing for better engagement with society and improved public safety,” dagdag ni Catapang.

Sa pagsulong ng bansa inihayag pa ni Catapang na tutuon sa pangakong rehabilitation at reintegration na hindi lamang magpapabago sa buhay kundi lumikha ng mga hakbang para sa mas patas at pagkakapantay-pantay sa lipunan. (Bhelle Gamboa)