P1.4M shabu nasabat sa Parañaque drug-bust
Sa mas maigting na kampanya kontra ilegal na droga ng Southern Police District (SPD) sa katimugang Metro Manila, aabot sa P1,428,000.00 na halaga ng umano’y shabu ang nakumpiska ng mga operatiba ng Parañaque City Police at naaresto ang tatlong suspek sa Barangay San Antonio sa lungsod.
Sa ilalim ng istratehiyang liderato ni SPD Acting District Director BGen Joseph R. Arguelles, ang Parañaque City Police sa pangunguna ni Chief of Police Col. Melvin R. Montante ay nagkasa ng buy-bust operation na nagresulta ng pagkaaresto ng mga suspek na sina alyas “Ace,” 19-anyos; alyas “MJBC,”; at “Wawa,” 21-anyos,pawang nakatira sa lungsod ng Parañaque at nakalista sa local drug watchlist.
Nakuha mula sa mga suspek ang tinatayang 210 na gramo ng umano’y shabh, buy-bust money, sling bag, at mobile phone na ginamit sa ilegal na transaksiyon.
“This operation reflects SPD’s sustained drive to disrupt the illegal drug trade in close coordination with the directives of our Chief PNP and RD NCRPO. Our intensified operations will continue to target individuals and networks responsible for distributing these harmful substances in our communities,” sabi ni BGen Arguelles.
Tinurn-over sa SPD Forensic Unit ang lahat ng nakumpiskang ebidensiya para suriin.
Nagpapatuloy ang follow-up operations ng otoridad upang tukuyin ang posibleng pagkakasangkot sa sindikato ng mga suspek.
Naninindigan ang SPD sa pangako nitong agresibo at intelligence-driven anti-drug operations sa katimugang Southern Metro upang tiyaking mas ligtas at drug-free ang mga komunidad. (Bhelle Gamboa)
