Higit P900K na halaga ng ‘shabu’ nakumpiska, 2 suspek arestado sa Parañaque City

Tnatayang 137 na gramo ng hinihinalang shabu na nagkakahalaga ng P931,000 ang nakumpiska ng otoridad at naaresto ang dalawang suspek sa ikinasang buy-bust operation sa #14 Simon Street, Multinational Village, Barangay Moonwalk, Parañaque City.

Ang mga naarestong suspek ay kinilalang sina alyas “James”, 40-anyos; at alyas “Abs”, 47-anyos, isang Grab driver, kapwa residente ng Parañaque City.

Ayon sa report ni PSSg Johnray Angelo Basa, may hawak ng kaso, nagkasa ng operasyon ang Philippine National Police-Drug Enforcement Group Special Operations Unit 3 (PNP-DEG SOU3) sa pamumuno ni Cpt John Carlos Arriesgado kasama ang mga tauhan ng PCP 6 Don Bosco Sub Station, PDEA NCR, RIUNCR at IMEGNCR na nagresulta ng pagkaaresto ng dalawang suspek at nakumpiska ang umano’y ilegal na droga, buy-bust money, at weighing scale o timbangan sa naturang lugar.

Ang mga narekober na ebidensiya ay tinurn-over sa Southern Police District Forensic Unit, Camp Bagong Diwa sa Taguig City habang pansamantalang nakakulong ang mga suspek sa PCP 6, Don Bosco Sub Station ng Paran̈aque City Police.

Lumilitaw sa records ng pulisya na si alya James ay may dati nang paglabag sa Comprehensive Dangerous Drugs Act of 2002 noong 2018 habang taong 2017 naman ang kinasangkutang paglabag sa kasong droga ni alyas Abs.

Inihahanda ng otoridad ang pagsasampa ng kasong paglabag sa RA9165. (Bhelle Gamboa)