Mahigit 200 driving schools inisyuhan ng show cause order ng LTO dahil sa iba’t ibang paglabag

Umabot sa 205 na driving schools sa bansa ang naisyuhan ng show cause orders ng Land Transportation Office (LTO) dahil sa mga paglabag gaya ng pamemeke ng computer system upang makatanggap ng dagdag na student drivers na lagpas sa daily limitation na itinakda ng ahensya.

Ayon kay LTO Chief, Assistant Secretary Atty. Vigor D. Mendoza II mayroon ding 88 pinuno ng iba’t ibang LTO District Offices ang hinihingan ng paliwanag kung bakit napayagan nilang magpatuloy ang paglabag ng mga driving school sa kanilang nasasakupan.
Ayon sa LTO ang mga driving school na inisyuhan ng SCO ay namemeke sa kanilang access sa Land Transportation Management System (LTMS) para makapag-upload ng mas maraming Theoretical Driving Course (TDC) and Practical Driving Course (PDC) certificates para sa kanilang mga kliyente, nag-iisyu din sila ng nasabing certificates kahit hindi natapos ng kliyente sa ang required na oras ng driving lesson, at nagsasagawa ng non-appearance issuance ng PDC at TDC certificates.

Ang TDC at PDC certificates ay parehong pangunahing requirements sa pagkuha ng driver’s license.

Noon lamang nakaraang buwan, mahigit 100 driving schools ang sinuspinde ng LTO dahil din sa mga anomalya.

Ayon kay Mendoza ang crackdown ay bahagi ng direktiba ni Pangulong Ferdinand Marcos Jr. at DOTr Sec. Vince Dizon na linisin ang LTO upang matiyak na maayos ang serbisyo at masiguro ang kaligtasan ng lahat ng road users. (DDC)