DSWD alam ang paggamit ng ilegal na droga ni Alyas Rose – ang babaeng nag-viral dahil sa paglabas sa imburnal sa Makati
Kinumpirma ng Department of Social Welfare and Development (DSWD) na alam ng kanilang mga social worker na gumagamit ng ilegal na droga si Alyas Rose ang babaeng tinulungan ng ahensya matapos mag-viral ang paglabas niya sa isang imburnal sa Makati.
Ayon sa DSWD umamin si Rose sa mga social worker hinggil sa kaniyang occasional drug use at bahagi ito ng client-social worker confidentiality para sa nagpapatuloy na case management ng ahensya kay rose.
Sinabi ni Director Marilyn Moral ng DSWD Pag-abot program, bahagi ng kondisyon ng kanilang pagtulong kay Rose ang pagsasailalim niya sa rehabilitasyon.
Ani Moral walang discrimination sa Pag-abot program ng DSWD na layong matulungan ang ang families and individuals in street situation (FISS).
Sa patuloy na case management kay Rose at sa partner nito, titignan ng DSWD kung bubuti ang kanilang pamumuhay at magiging produktibong miyembro sila ng komunidad.
Ayon kay Moral batid ng DSWD na ang mga kahalintulad ni Rose ay kinakailangang bigyan ng tulong sa pamamagitan ng holistic approach dahil ang paggamit ng ipinagbabawal na gamot ay isang medical issue na mayroong psychosocial na dahilan at epekto.
Ginawa ng DSWD ang pahayag matapos na makapanayam si Rose ng isang vlogger at inamin niya doon ang kaniyang pagbibisyo.
Si Rose ay nag-viral matapos makuhanan ng larawan nang lumabas siya mula sa isang imburnal sa Makati.
Hinanap siya ng DSWD, tinulungan at binigyan ng P80,000 na kaniyang ginamit na puhunan para makapagtayo ng Sari-Sari store.
Sa pahayag sinabi ni DSWD Secretary Rex Gatchalian na bahagi ng mandato ng DSWD ang tulungan ang mga kagaya ni Rose na mabigyang ng pagkakataon na bumuti ang buhay.
Hindi lang aniya materyal na tulong ang kanilang ibinibigay kundi tinutulungan din ang mga ito na muling magkaroon ng pag-asa. (DDC)
