9 na babuyan sa Central Luzon inisyuhan ng show cause order ng BAI

Inisyuhan ng show cause order ng Bureau of Animal Industry (BAI) ang siyam na babuyan sa Central Luzon na nag-ooperate ng walang lisensya.

Ang hakbang ay bahagi ng crack down ng pamahalaan laban sa mga hindi rehistradong livestock facilities.

Ayon kay Agriculture Secretary Francisco P. Tiu Laurel Jr., ang mga hog farms na nasa Bulacan, Pampanga, at Tarlac ay inatasang ipaliwanag ang kanilang patuloy na operasyon sa kabila ng hindi pagsunod sa basic health, environmental, at safety regulations.

Ang ilegal na operasyon ng nasabing mga babuyan ayon sa kalihim ay nakaaapekto sa hakbang ng gobyerno para ma-stabilize ang suplay at presyo ng ng karne ng baboy sa bansa.

Inatasan din ni Tiu Laurel ang BAI na mas palawigin pa ang pag-inspeksyon sa mga hog farms sa bansa para masiguro ang pagsunod ng mga ito sa regulasyon. (DDC)