Dalawang Customs broker arestado sa pangingikil
Inaresto ng mga tauhan ng Bureau of Customs’ (BOC) Customs Intelligence and Investigation Services-Manila International Container Port (CIIS-MICP) ang dalawang Customs broker na umano ay sangkot sa extortion activity at nambibiktima ng local freight forwarder.
Ikinasa ng CIIS-MICP ang operasyon katuwang ang National Bureau of Investigation-Anti-Organized and Transnational Crime Divison (NBI-AOTCD) sa Maku Coffee sa Ermita, Manila kung saan nadakip ang Customs broker na sina Wyeth Lara Navales at Leila Lara Navales.
Nabatid na tinangka ng dalawa na mangikil kay Kenji Otsuka ng Otsuka Freight Forwarders Co., Ltd. At hiningan ito ng P1.9 million na tinawag ng mga broker na “pampadulas” para sa mas mabilis na transaksyon sa Customs.
Ayon kay BOC-CIIS Director Verne Enciso, kinabukasan matapos nilang matanggap ang reklamo mula kay Otsuka ay agad ikinasa ang operasyon at naaresto ang magkapatid na Navales.
Sinabi ni Enciso na batay sa pahayag ni Otsuka, nauna na siyang nakapagbigay ng P500,000 para sa shipment ng kaniyang kumpanya pero hinihingan pa siya ng P1.9 million ng dalawang suspek.
Ayon naman kay Deputy Commissioner for Intelligence Group Juvymax Uy ang P500,000 na unang hiningi kay Otsuka ni Wyeth Navales ay para umano sa “all-inclusive engagement fee” na kinabibilangan ng broker’s fee at customs duties and taxes.
Nang dumating ang shipment, sinabi ni Wyeth kay Otsuka nan aka-hold ang kaniyang shipment at nakatakdang isyuhan ng Warrant of Seizure and Detention (WSD) kaya kailangan niyang magbayad ng P1.9 million.
Kinondena naman ni BOC Commissioner Bien Rubio ang ilegal na aktibidad ng dalawang broker.
Kasabay nito ay pinapurihan ng Customs Commissioner ang mabilis na aksyon para mahuli ang mga ito.
Tiniyak ni Rubio na sasampahan ng kaso ang dalawa at mananagot sa kanilang ginawa.
Ang magkapatid na Navales ay naisailalim na sa booking procedure ng NBI at sasampahan ng reklamong Robbery with Violence o Intimidation of Persons by Way of Extortion sa ilalim ng Revised Penal Code. (DDC)
