19 pang bagyo aasahang papasok o mabubuo sa loob ng bansa ngayong taon

Sa nalalabing ilang buwan ngayong 2025 inaasahan na mayroong hanggang 19 na bagyo na papasok o mabubuo sa loob ng Philippine Area of Responsibility (PAR).

Ayon sa PAGASA, ito ay simula ngayong buwan ng Hunyo hanggang Nobyembre ngayong taon 2025.

Sa infographic ng PAGASA ipinakita ang climatological tracks ng mga bagyong dumaan at pumasok ng PAR mula taong 1948 hanggang 2015 at ang bilang ng mga bagyo na maaring mabuo kada buwan.

Ang pagtaya na ito ay base sa isinagawang 184th Climate Outlook Forum ng ahensya.

Ayon sa PAGASA, ngayong buwan ng Hunyo, maaaring magkaroon ng hanggang 2 bagyo sa bansa at hanggang 3 bagyo naman sa Hulyo.

2 o 3 bagyo din ang maaaring pumasok o mabuo sa loob ng PAR sa Agosto.

Habang sa Setyembre at Oktubre maaaring magkaroon ng tig 2 hanggang 4 na bagyo.

Sa Nobyembre naman ay magkakaroon ng 2 hanggang 3 bagyo sa bansa. (DDC)