Kaso ng dengue sa Quezon City bumaba sa nakalipas na mga linggo

May pagbaba na sa mga naitatalang kaso ng dengue sa Quezon City sa nakalipas na mga linggo.

Ayon sa Quezon City Dengue Surveillance Update, nakapagtala ng 5,138 total dengue cases sa lungsod mula January 1, 2025 hanggang June 2, 2025.

Hanggang noong June 2, nakapagtala na ng 13 nasawi dahil sa sakit.

Karamihan sa tinamaan ng sakit na dengue sa lungsod ay mga edad 10 pababa.

Ang 5,138 cases ay 287 percent na mas mataas kumpara sa parehong petsa noong 2024.

Gayunman, simula nang ideklara ang dengue outbreak sa Quezon City noong Feb. 15, 2025 ay bumaba na ng 93 percent ang naitatalang mga kaso kada linggo.

Sa kabila ng pagbaba ng kaso nitong nagdaang mga lingo, nagpaalala ang QC LGU sa mga residente na sundin ang mga hakbang upang maprotektahan ang sarili at ang pamilya laban sa lamok na nagdadala ng sakit.

Kabilang dito ang pagpapanatili na malinis ang kapaligiran, pag-alis sa mga pinamumugaran ng lamok sa loob at labas ng bahay, protektahan ang sarili sa kjagat ng lamok, palakasin ang resistensya ng katawan at agad na magpakonsulta kung may sintomas ng dengue. (DDC)