School supplies na nabili sa mga tindahan sa Metro Manila nagtataglay ng nakalalasong kemikal – BAN Toxics
Ikinabahala ng toxic watchdog na BAN Toxics ang presensya ng nakalalasong kemikal sa mga school supplies na nabibili sa mga tindahan sa Metro Manila.
Sa isinagawang market sampling, bumili at sinuri ng grupo ang 17 uri ng school items na binili mula sa bargain shops at ambulant vendors sa Caloocan, Manila, Pasay, Quezon City, at Taguig.
Sa 150 samples na isinailalim sa screening gamit ang Handheld XRF Analyzer, dalawang school items ang nakitaan na nagtataglay ng “dangerously high levels” ng nakalalasong lead.
Ito ay kinabibilangan ng kiddie backpack na may cartoon character design at red-painted water container.
Ang iba pang school supplies na sinuri gaya ng lapis, pangkulay, pantasa, pambura, plastic envelopes, watercolors, at vinyl paper clips, ay may taglay ding kemikal gaya ng arsenic, antimony, barium, cadmium, at chromium.
Ayon kay BAN Toxics Advocacy and Campaign Officer Thony Dizon, nakababahala ito lalo ngayong nalalapit na ang pasukan at marami na ang mamimili ng gamit sa eskwela.
Dagdag pa ni Dizon karamihan sa mga nabiling school supplies ng kanilang grupo ay walang kumpletong product information at warning labels.
Dahil dito ay nanawagan ang BAN Toxics sa Department of Trade and Industry (DTI) at Food and Drug Administration (FDA) na magsagawa ng on-site inspection, test-buys at magpalabas ng health and safety advisory para masiguro na pawang rehistradong school supplies lamang ang maibebenta sa merkado.
Ayon sa World Health Organization, ang pagkakalantad sa lead ay may seryosong banta sa kalusugan ng mga bata dahil maaari itong magdulot ng severe damage to the brain at nervous system. (DDC)
