Higit 70 pamilyang nasunugan sa Las Piñas City, tinutulungan ng LGU
Agad pinuntahan kagabi ni Mayor-elect April Aguilar ang mahigit 70 na pamilyang apektado ng sunog na sumiklab sa isang residential area sa Las Piñas City.
“Hindi ko po kayang balewalain ang sakit at hirap na pinagdadaanan ngayon ng ating mga kababayang nasunugan kahapon sa Samatierra Compound sa Almanza Uno,” pahayag ni Mayor Aguilar.
Personal na inalam ng halal na punong lungsod ang kalagayan at kaligtasan ng mga pamilyang nasunugan na pansamantalang nanunuluyan sa Almanza Uno Covered Court.
Kaagad namang nagtayo ang lokal na pamahalaan ng mga modular tent na magagamit ng mga biktima.
“Dama ko po ang bigat ng inyong pinagdadaanan. Nawalan kayo ng tirahan, ng mga gamit, at ng mga alaala sa isang iglap. Pero sa gitna ng trahedya, hangad ko pong ipadama na hindi kayo nag-iisa,” sabi ng alkalde sa mga nasunugan.
Magkatuwang ang City Social Welfare and Development Office at mga opisyal ng barangay para sa agarang pagtukoy ng pangunahing pangangailangan ng mga nasunugan tulad ng pagkain, tubig, kalinisan, at maayos na tulugan.
Sinisiguro naman ni Mayor Aguilar ang tuluy-tuloy na suporta at agarang tulong na kanilang kinakailangan.
“Sa mga nasunugan po sa Samatierra, kapit lang po tayo. Kasama ninyo kami sa pagbangon,” ani Mayor Aguilar. (Bhelle Gamboa)
