P6.8M na halaga ng ‘shabu’ nakumpiska ng NAIA-IADTG; babaeng suspek arestado

Nasabat ng otoridad sa loob ng isang kargamento o package na naglalaman ng hinihinalang Methamphetamine Hydrochloride o shabu na nagkakahalaga ng ₱6,854,400.00 na nagresulta ng pagkaaresto ng isang babaeng suspek na si alyas “Ruth”, 28-anyos.

Ayon sa report na isinumite ng Philippine Drug Enforcement Agency (PDEA) PDEA RO NCR, ang nakumpiskang package ay nakadeklarang “ladies’ wear a bags” na galing naman sa Ontario, Canada.

Ang suspek ay kabilang sa nakalistang consignee kung saan hindi umano niya alam na naglalaman ng ilegal na droga ang naturang kargamento.

Sa isinagawang inspeksiyon, nadiskubre ng otoridad ang mga selyadong transparent plastic bags na nakabalot ng foil at cling wrap na pawang naglalaman ng tinatayang isang kilo ng umano’y shabu.

Nakumpiska sa gitna ng operasyon ang mobile phone, notice card, at ilang IDs isa rito ang nakalagay ang pangalan ng suspek at ang iba naman ay peke at sa ilalim ng iba’t ibang pagkakakilanlan.

Sasampahan ang suspek ng kasong paglabag sa Comprehensive Dangerous Drugs Act of 2002. (Bhelle Gamboa)