P4M na halaga ng hindi rehistradong farm inputs nakumpiska ng DA

Nakumpiska ng Fertilizer and Pesticide Authority (FPA) ng Department of Agriculture at Philippine National Police Criminal Investigation and Detection Group – National Capital Region (PNP-CIDG-NCR) ang libo-libong hindi rehistradong mga pestisidyo at produktong pataba na nagkakahalaga ng tinatayang P4 million.

Kabilang sa mga nakumpiskang mga bagay ay ang mga sumusunod:

– 641 na tig-isang litro ng mga botelya ng Axonic pesticide
– 748 one-liter bottles ng Sapphire pesticide
– 220 one-liter bottles ng Chlonil pesticide
– apat na sako ng Welzeb
– iba’t ibang uri ng bio-stimulant Nutrinaro SC-5, 590 sachets (10g), 345 sachets (50g), at 90 sachets (5g).

Naka-recover din ang mga otoridad ng 220 piraso at 800 packs ng Norino Plus (10g), kasama ang tatlong containers ng hindi matukoy na mga kemikal.

Ayon sa FPA, ang brands na Axonic, Sapphire, Chlonil at Welzeb ay hindi rehistrado sa ahensiya at maituturing na illegal.

Natuklasan din ng mga imbestigador na ang mga produkto ay ni-repacked na lokal subalit pinalitaw sa kanilang advertisement na imported, upang lituhin ang kanilang mga buyer.

Lahat ng mga nakumpiskang bagay ay itinurn-over sa Department of Agriculture para sa safekeeping at legal na dokumentasyon.

Nagpapatuloy ang imbestigasyon at mga karampatang kaso ang isasampa alinsunod sa mga umiiral na batas. (DDC)