50 motorista na gumamit ng pantakip sa plaka para makaiwas sa NCAP, padadalhan ng show cause order ng LTO

Nagpapalabas ng show cause order ang Land Transportation Office (LTO) laban sa nasa 50 motorista na nagtakip ng kaniyang plaka para lamang makaiwas sa No-Contact Apprehension Policy (NCAP).

Ayon kay LTO Chief, Assistant Secretary Atty. Vigor D. Mendoza II, kasong administratibo at kriminal ang maaaring kaharapin ng nasabing mga motorista.

Katuwang ang MMDA, sinabi ni Mendoza na marami na ang nakita na tinakpan ang kanilang plaka para hindi mahuli sa NCAP.

Isinumite na ng MMDA sa LTO ang mga ebidensya laban sa 50 motorista na nahuling nagtakip ng plaka ng kanilang saskayan.

Ayon kay LTO Executive Director Greg Pua, ang nasabing modus ay paglabag sa
Republic Act 11235 o Motorcycle Crime Prevention Act na nagpapataw ng parusa laban sa pag-tamper ng license plates.

Sa ilalim ng nasabing batas, ang pag-tamper, pagbago, pagbura pagtakip o pagtago sa numero ng license plate ay may kaukulang parusa na pagkakabilanggo ng 6 na buwan hanggang 2 taon. (DDC)