9 na sako na puno ng ilegal na droga, nakumpiska ng PCG sa Bataan

Nakumpiska ng mga tauhan ng Philippine Coast Guard (PCG) ang siyam na sako na naglalaman ng ilegal na droga sa baybayin ng Mariveles, Bataan araw ng Lunes, June 2.

Ayon sa PCG, isang mangingisda sa lugar ang nakakita sa mga sako at agad itong ipinaalam sa Coast Guard Station (CGS) Bataan.

Nakita ng mangingisda ang mga sako habang siya ay nasa laot sa karagatan ng Zambales at naghinala na agad siya na ilegal ang laman nito kaya isinakay niya ito sa kaniyang bangka at iniuwi sa Mariveles, Bataan para maisuko sa mga otoridad.

Sa ginawang joint inspection ng CGS Bataan Quick Response Team, PCG K9 Unit Bataan, at PCG Intelligence personnel positibong natukoy ng K9 units na may presensya ng ilegal na droga sa mga sako.

Ipinoproseso na ang pag-turnover sa mga ilegal na droga sa Philippine Drug Enforcement Agency (PDEA). (DDC)