Babaeng pasahero sa NAIA T3 nahulihan ng P13.7M na halaga ng shabu

Inaresto ng otoridad ang isang 62-anyos na babaeng pasahero matapos madiskubre sa kanyang bagahe ang P13,763,200.00 na halaga ng umanoy ilegal na droga sa kasagsan ng routine security screening sa Ninoy Aquino International Airport (NAIA) Terminal 3 sa Pasay City.

Nagsasagawa ng operasyon ang mga operatiba ng NAIA Inter-Agency Drug Interdiction Task Group (IADITG) sa Final Security Screening Checkpoint sa International Departure Area na nagresulta ng pagkaaresto ng suspek na si alyas “Aida” na nakatakda na sanang sumakay ng eroplano patungong Bacolod City.

Narekober mula sa suspek ang isang hand-carry baggage na may lamang karton na naglalaman ng tinatayang dalawang kilo ng pinaniniwalaang shabu, cellular phone, digital weighing scale, travel documents, at IDs.

Ang suspek ay nasa kustodiya ng otoridad at nakatakdang sampahan ng kasong paglabag sa Comprehensive Dangerous Drugs Act of 2002. (Bhelle Gamboa)