Halos 700 na bata nabigyan ng libreng pagkain sa feeding program ng Las Piñas LGU
Halos 700 pang mga bata ang nabigyan ng libre at masustansiyang pagkain sa ilalim ng isinasagawang Programang Pang-Nutrisyon para sa Las Pin̈eros, na bahagi ng city-wide feeding program ng Las Piñas City Nutrition Office na ginanap sa St. Mary Homes Covered Court Barangay Almanza Uno.
Sa pamamagitan ng Kusina ng Las Piñas ay naserbisyuhan ng lokal na pamahalaan ang mga bata at nahandugan sila ng pork picadillo rice toppings at bottled water.
Layunin ng hakbang na ito na magbigay ng accessible at masustansiyang pagkain sa kabataang Las Piñeros partikular na ngayong school break, upang tumulong na sumapat ang kinakailangan nilang nutrisyon.
Tiniyak ng mga volunteer at staff mula sa City Nutrition Office na maayos ang pamamahagi ng pagkain sa tulong ng community leaders at local personnel.
Personal namang sinubaybayan ni Mayor-elect April Aguilar ang feeding program at tumulong siya sa distribusyon ng pagkain at masayang nakisalamuha sa mga bata at kanilang mga magulang.
Ang presensiya ng halal na alkalde ay sumasalamin sa kanyang administrasyon na patuloy na sumusuporta sa mga inisyatibong pang-nutrisyon at direktang pagtulong sa komunidad.
Nabatid na ang Programang Pang-Nutrisyon para sa Las Piñeros ay nananatiling mahalagang parte ng public health strategy ng Las Piñas na layong abutin ang mas maraming nangangailangang komunidad at suportahan ang kalusugan at kapakanan ng mga bata sa buong lungsod. (Bhelle Gamboa)
