DOJ bumuo ng team para trabahuhin ang pagbalik sa bansa ni Teves

Bumuo na ng team ang Department of Justice (DOJ) para agad maiproseso ang pag-uwi sa bansa ni dating Congressman Arnolfo Teves Jr., na wanted sa patong-patong na mga kaso ng murder at frustrated murder.

Kasunod ito ng utos ng pamahalaan ng Timor-Leste na nagpalabas ng administrative deportation laban kay Teves.

Batay sa official deportation documents na inilabas ng Ministry of the Interior of Timor-Leste agad bumuo ng team ang DOJ na kinabibilangan ng mga kinatawan mula sa kagawaran, Bureau of Immigration (BI), at National Bureau of Investigation (NBI) para s amabilis na pakikipag-ugnayan sa Timorese authorities at upang maiproseso ang ligtas na repatriation ni Teves.

Sa naging pahayag ng Presidency of the Council of Ministers ng Timor-Leste idineklara na ang presensya ni Teves sa nasabing bansa ay banta sa national security at public order dahil sa mga kinakaharap nitong kaso at dahil sa kawalan ng legal authorization para manatili siya doon.

Sa ilalim ng administrative deportation laban kay Teves, binabawalan na din siyang bumalik sa Timor-Leste sa loob ng 10-taon. (DDC)