PhilHealth nabayaran na ang P592M na total claims ng NKTI sa unang limang buwan ng taon

Nabayaran na ng Philippine Health Insurance Corporation (PhilHealth) ang P592 million na total claims ng National Kidney and Transplant Institute (NKTI) sa loob ng unang limang buwan ng taon mula January 1 hanggang May 21, 2025.

Sinabi ito ni Acting PhilHealth President and CEO Dr. Edwin M. Mercado kasabay ng kaniyang pagbisita sa NKTI para siguruhin na ang mga pasyente na sumasailalim sa hemodialysis at iba pang renal replacement therapies ay nagagamit ang kanilang health insurance coverage.

“Alinsunod sa prayoridad ng ating Pangulong Bongbong Marcos, Jr., ako ay bumibisita at nakikipagpulong sa mga partner health care facilities para malaman at personal kong makita kung paano natutugunan ang pangangailangan ng ating mga kababayang may sakit, at siguruhing mabilis tayong nakapagbabayad ng mga benefit claims,” ayon kay Dr. Mercado.

Sa datos ng NKTI, kada oras ay mayroong isang Filipino ang nakararanas ng chronic renal failure o katumbas ng 120 Filipinos per million population taun-taon.

Simula 2023, patuloy naman ang PhilHealth sa pagpapalawak pa ng benepisyo ng mga miyembro nito na mayroong Chronic Kidney Disease (CKD) Stage 5.

Ang coverage para sa hemodialysis sessions ay itinaas mula sa 90 patungo sa 156 sessions per year.

Itinaas din ng PhilHealth ang Z Benefit Package para sa Peritoneal Dialysis na nag-aalok ng financial assistance na hanggang P1.2 million.

Ang Z Benefit coverage para sa Kidney Transplantation ay itinaas din mula sa dating P600,000 patungo sa P2 million.

Sa loob ng unang limang buwan ng kasalukuyang taon ay umabot na sa P161 million ang halagang na-cover ng PhilHealth para sa hemodialysis procedures sa NKTI.

“Nakatutok ang PhilHealth sa epekto ng mga pagbabago ng benepisyo na talagang madama ng mga miyembrong nangangailangan. Kung dati ay nangangamba ang dialysis patients kung matatapos nila ang lahat ng sessions sa isang taon, ngayon tinanggal na natin ‘yan. Bumabalik sila sa PhilHealth na tuwang-tuwa, nagpapasalamat. Nabigyan natin sila ng pag-asa na bukas ulit at sa buong taon, siguradong may dialysis session pa ulit na sagot ng PhilHealth. Ito po ang patunay ng aming misyon na maihatid ang PhilHealth na mabilis, patas, at mapagkakatiwalaan,” dagdag ni Mercado. (DDC)