Pagtatayo ng halfway houses sa OPPFs ng BuCor ipinag-utos ni Catapang
Ipinag-utos ni Bureau of Corrections (BuCor) Director General Gregorio Pio P. Catapang Jr. ang pagtatayo ng halfway houses sa lahat ng operating prisons and penal farms (OPPFs) sa bansa upang palakasin ang reintegration program para sa mga persons deprived of liberty (PDLs).
Ayon kay Catapang ang inisyatibong ito ay naglalayong paghandaan hindi lamang ang napipintong paglaya ng PDLs kundi tiyakin din na mayroong suporta at resources na kinakailangan para sa kanilang matagumpay na reintegrasyon sa lipunan.
Sa kanyang memorandum para sa OPPFs Superintendents at external affair sections o units, binigyang-diin ng BuCor chief ang kahalagahan ng komprehensibong programa ng PDLs sa halfway houses.
Sinasaklawan ng mga programang ito ang counseling sessions, orientation activities, interviews, at short courses na dinisenyo upang magkaroon ng kakayanan at kaalaman na kailangan sa buhay ng PDLs pagkatapos ng kanilang pagkakabilanggo.
Aniya ang ganitong hakbang ay kumikilala sa paghahanda ng mga indibiduwal para sa reintegrasyon higit sa simpleng pagtatakda ng kanilang paglaya ngunit kinakailangang magkaroon ng magagamit na instrumento sa kanilang epektibong pagharap sa mga hamon sa lipunan.
“This halfway houses will serve as temporary residences for individuals awaiting release and are envisioned not only as transitional spaces but also as secure holding areas for released PDLs whose settlement arrangements are still pending,” sabi ni Catapang.
Para sa matagumpay na implementasyon ng inisyatiba, inatasan ni Catapang ang concerned officers na magsumite ng mga detalyadong plano at disenyo ng halfway house kasama na rito ang malinaw na budgetary requirements.
Inihayag pa ni Catapang na habang ang proyekto ay pinaplano at pinopondohan, pinapatukoy din nito sa concerned officials ang angkop na erya kung saan pansamantalang mananatili ang mga palalayaing PDLs upang maihiwalay sila sa karamihang PDLs at pagtuunang-pansin ang reintegration programs na laan para sa kanila.
Magsisilbing gabay naman nila ang technical description mula sa Revised Implementing Rules and Regulation of Republic Act 10575 o mas kilala sa tawag na Bucor Modernization Act of 2013. (Bhelle Gamboa)
