Korean national timbog sa tangkang pagpuslit ng ilegal na droga sa NAIA

Isang 63-anyos na Korean national ang inaresto ng otoridad makaraang tangkaing ipuslit ang pinaghihinalaang ilegal na droga sa kasagsagan ng routine security screening sa Ninoy Aquino International Airport (NAIA) Terminal 1 sa Pasay City.

Dakong ala-1:00 ng madaling araw nagsasagawa ng operasyon ang ang operatiba ng NAIA Inter-Agency Drug Interdiction Task Group (IADITG) sa Final Security Screening Checkpoint sa International Departure Area na nagresulta ng pagkaaresto ng suspek na nakatakda na sanang sumakay sa eroplano patungong Incheon, South Korea.

Nadiskubre ang pinaniniwalaang shabu na nagkakahalaga ng P34,000.00 sa loob ng sling bag ng suspek.

Narekober din ng otoridad ang drug paraphernalia, cellular phones, travel documents, at IDs .

Ang suspek ay kasalukuyang nasa kustodiya ng otoridad at sasampahan ng kasong paglabag sa Comprehensive Dangerous Drugs Act of 2002. (Bhelle Gamboa)