P1B na halaga ng ilegal na droga nakumpiska ng PDEA sa bahay ng isang Chinese National sa Angeles City

Nakumpiska ng Philippine Drug Enforcement Agency (PDEA) ang mahigit P1 billion na halaga ng ilegal na droga sa Angeles City Pampanga.

Isinilbi ng PDEA katuwang ang mga tauhan ng AFP-Counterintelligence Group, National Intelligence Coordinating Agency (NICA); at Philippine National Police ang search warrant sa loob ng isang bahay sa Orchid Street, Timog Hills Subdivision, Barangay Pampang sa nasabing lungsod.

Ayon kay PDEA Director General Undersecretary Isagani Nerez, nakita ang mga hinihinalang shabu sa loob ng bahay na nasa loob ng 155 transparent plastic bags na may bigat na isang kilo kada isa.

Abandonado ang nasabing bahay kaya walang inabutan na tao ang PDEA.

Subject ng nasabing search warrant ang isang Chinese national na ngayon ay pinaghahanap na ng mga otoridad.

Mahaharap sa kasong paglabag sa Republic Act 9165 o Comprehensive Dangerous Drugs Act of 2002. (DDC)