NFA warehouse sa Malolos, Bulacan muling binuksan

Pinangunahan ni Agriculture Secretary Francisco P. Tiu Laurel Jr. ang muling pagbubukas ng warehouse ng National Food Authority (NFA) sa Malolos, Bulacan.

Bahagi ito ng layunin ni Pangulong Ferdinand Marcos Jr. na mas palakasin pa ang palay procurement upang mapabuti ang kita ng mga magsasaka at mapanatili ang P20 per kilo rice program ng gobyerno.

Ayon kay NFA Administrator Larry Lacson isinailalim muna sa rehabilitasyon ang nasabing warehouse na pinondohan ng P10.4 million para maiayos ang electrical systems, ventilation, at safety features.

Ang nasabing warehouse ay itinayo noong 1979 at may lawak na 2,400-square-meter.

Matapos ang repair ay kaya na nitong mag-imbak ng 70,000 na 50-kilo bags ng palay o bigas. (DDC)