NCRPO nagpakalat ng halos 22,000 na pulis sa Metro Manila
Nasa kabuuang 21,532 na pulis ang dineploy ni National Capital Region Police Office (NCRPO) Regional Director Major General Anthony A. Aberin sa buong Metro Manila upang paigtingin ang 24/7 proactive police visibility bilang pagtugon sa direktiba ng Pangulong Ferdinand Marcos Jr. para tiyaking napapanatili ang presensiya ng otoridad, maaasahan, at mararamdaman ito ng mga komunidad simula ngayong Lunes, Mayo 26.
Ginanap ang seremonya ng deployment sa NCRPO Grandstand sa Camp Bagong Diwa, Bicutan na dinaluhan ng mahahalagang opisyal sa pangunguna ni Department of the Interior and Local Government (DILG) Secretary Juanito Victor C. Remulla upang siguruhin ang nagkakaisang hakbang ng administrasyin na palakasin ang kaligtasan at tiwala ng publiko.
Ayon sa ulat, ang naturang kabuuang bilang ng pulis na ipinakalat sa Metro Manila ay galing sa limang Police Districts (NEMSQ), Regional Mobile Force Battalion (RMFB), at sa Regional Headquarters (RHQ).
Kabilang sa komprehensibong deployment ang 12,539 officers na itinalaga sa beat patrols, 2,944 sa mobile patrols kasama rito ang 1,993 personnel na gagamit ng motor vehicles, 931 sa motorsiklo, at 20 naman sa bisikleta at 293 iba pa sa MRT/LRT facilities.
Nasa 629 personnel naman ang dineploy sa checkpoints, 344 ang magmamando sa border control points habang 1,794 ang itinalaga sa fixed visibility posts at outposts, at 2,989 personnel naman sa administrative patrol duties.
Bukod pa rito ang tulong na hakbang mula sa 240 force multipliers buhat sa trained community volunteers at partner stakeholders na susuporta sa frontline operations na magsisilbing mata at tenga sa paligid.
“NCRPO responds decisively to the call of the President and the SILG for a more proactive, intensified, and strategic police visibility. We will deliver to the public a police force that can be seen, heard and felt, not only to deter crime but more importantly, to instill the feeling of safety and security in Metro Manila,” pahayag ni MGen Aberin.
“People should see police officers walking around regularly. Over time, they get to know them, and that familiarity brings a sense of safety,” sabi naman ni Secretary Remulla sa kanyang podcast.
Ang nasabing inisyatiba ay pagpapalakas sa mithiin ng NCRPO’s AAA Program (Able, Active, Allied) na nakatuon sa proactive policing, mas malakas na community partnerships, at pagpapaganda ng visibility bilang istratehiyang pagpigil laban sa krimen.
Samantala, nagsagawa rin ng seremonya ng deployment ang Southern Police District (SPD) sa ilalim ng liderato ni Acting District Director Brigadier General Joseph R. Arguelles, sa SPD Grandstand, Lawton Avenue, Barangay Fort Bonifacio, Taguig City.
Pinangunahan ang aktibidad ni Colonel Jessie Ballad Tamayao, Deputy District Director for Administration bilang kinatawan ni BGen Arguelles, na dinaluhan ng SPD personnel, force multipliers, barangay partners, at community volunteers na kanilang matibay na tugon sa pagpapanatili ng kaaayusan at kapayapaan sa katimugang bahagi ng Metro Manila. (Bhelle Gamboa)
