Bata mananatiling legitimate ang status kahit maideklarang walang bisa ang kasal ng kaniyang magulang – SC
Nananatiling legitimate ang mga bata kahit pa naideklarang walang bisa ang kasal ng kanilang mga magulang sa grounds na psychological incapacity.
Sa desisyon ng Supreme Court 2nd Division na isinulat ni Associate Justice Jhosep Y. Lopez, binago nito ang naging pasya ng Regional Trial Court (RTC) na nagdeeklarang illegitimate na ang isang bata matapos mapawang bisa ang kasal ng kaniyang magulang.
Sa rekord ng kaso, ipinanganak ang bata ilang buwan bago ikasal ang kaniyang magulang.
Nakaranas ang kaniyang ina ng physical, emotional, at verbal abuse mula sa asawa nito na isang alcoholic, sugarol at nambababae rin.
Dahil dito ay nagpasya ang babae na maghain ng petisyon para mapawalang bisa ang kanilang kasal na inaprubahan ng mababang korte matapos mapatunayan ang pagiging psychological incapacity ng lalaki.
Sa pasya ng RTC ay idineklara ding illegitimate ang bata dahil ipinanganak umano ito bago ang kasal.
Sa desisyon ng Korte Suprema, pinagtibay ang pagpapawalang bisa sa kasal ng mag-asawa pero sinabing dapat manatiling legitimate ang status ng bata.
Ayon sa SC, sa general rule, kapag napawalang bisa ang kasal, ang bata ay ituturing na illegitimate.
Gayunman, mayroong exceptions sa ilalim ng 𝘍𝘢𝘮𝘪𝘭𝘺 𝘊𝘰𝘥𝘦, at kabilang dito ang kung ang dahilan ng pagpapawalang bisa sa kasal ay psychological incapacity.
Ayon sa SC, kung ang bata ay naging legitimate sa ilalim ng 𝘍𝘢𝘮𝘪𝘭𝘺 𝘊𝘰𝘥𝘦, walang anumang legal na basehan para mabago ang status nito at maging illegitimate. (DDC)
