Halos P400K na halaga ng ‘shabu’ nakumpiska sa Taguig drug-bust

Naaaresto ng mga operatiba ng Taguig City Police – Station Drug Enforcement Unit (SDEU) ang dalawang drug personalities at nakumpiska ang kabuuang ₱367,200.00 na halaga ng hinihinalang shabu sa isinagawang buy-bust operation sa Barangay New Lower Bicutan sa lungsod.

Ang mga suspek ay kinilalang sina alyas “Jay,” 44-anyos, isang High-Value Individual (HVI), at alyas “Orlando”, 29-anyos, driver at bagong tukoy na Street Level Individual (SLI), kapwa residente sa naturang barangay.

Sa gitna ng operasyon na pinangunahan ni Cpt Kenny Khamar D. Khayad sa ilalim ng liderato ni Col. Joey T Goforth, hepe ng Taguig CPS, nakumpiska ang tinatayang 54 na gramo ng umano’y shabu, marked buy-bust money, at pouch na pinaglagyan ng naturang kontrabando.

Sasampahan ang mga suspek ng kasong paglabag sa Comprehensive Dangerous Drugs Act of 2002 sa Taguig City Prosecutor’s Office.

Samantala, tiniyak ng Southern Police District sa publiko na patuloy ito sa kanyang pananagutan para sa drug-free na komunidad. Ang lahat ng kinakailangang legal na pamamaraan ay istriktong sinusunod para siguruhin ang integridad ng kaso at ng kaligtasan ng publiko. (Bhelle Gamboa)