Mga OFW at kanilang pamilya pinag-iingat kasunod ng ulat ng pagtaas ng kaso ng COVID-19 sa Southeast Asia

Pinag-iingat ng Department of Migrant Workers (DMW) ang mga overseas Filipino workers (OFWs) at kanilang pamilya kasunod ng napaulat na pagtaas ng kaso ng COVID-19 sa ilang mga bansa sa Southeast Asia.

Pinaalalahanan ni Migrant Workers Secretary Hans Leo J. Cacdac ang mga OFW na pangalagaan ang kanilang kalusugan at sumunod sa mga umiiral na health and safety protocols sa mga bansa kung saan sila naroroon.

Ayon sa DMW, mas mainam na patuloy na isagawa ng mga OFW ang mga epektibong preventive measures para makaiwas na matamaan sila ng COVID-19 at iba pang infectious diseases.

Kabilang dito ang pagsusuot ng face masks kapag nasa loob sila ng healthcare facilities, pananatili sa bahay kapag may sakit, pagtatakip ng bibig kapag umuubo o bumabahin, regular na paghuhugas ng kamay gamit ang sabon at tubig at agad na pagpapatingin sa doctor kapag nakaranas ng sintomas.

Kasabay nito ay tiniyak ng DMW na ang mga Migrant Workers Offices nito sa Southeast Asia ay handing umasiste sa mga OFW na mangangailangan ng tulong. (DDC)