DA pinatitiyak sa NFA na de kalidad ang bigas na ibinebenta sa ilalim ng P20-per-kilo rice program ng pamahalaan

Nakipagpulong si Agriculture Secretary Francisco P. Tiu Laurel Jr. sa mga opisyal ng National Food Authority (NFA) para masigurong de kalidad ang ibinebentang bigas sa ilalim ng P20-per-kilo rice program ni Pangulong Ferdinand Marcos Jr.
Ayon sa kalihim na siya ring chairman ng NFA Council, ang subsidized rice program ay pagkakataon na ng NDA para mabago ang matagal nang persepsyon kapag sinabing NFA rice ay panget ang kalidad ng bigas.

Sinabi ni Tiu Laurel na dapat patunayan ng ahensya na ang bigas ng NFA ay hindi lamang abot-kaya kundi masarap din, masustansya at nakasasabay sa kalidad ng mga imported varieties.

Sa ilalim ng Rice Tariffication Law, ang NFA ay hindi nag-aangkat ng bigas para sa kanilang buffer stocks. Sa halip ay bumibili na lamang ito ng palay sa mga lokal na magsasaka bilang suporta sa domestic production at masiguro ang fair pricing.

Kamakailan ay inatasan ni Pangulong Marcos ang DA na palawigin pa ang rice program para mas maraming Pinoy ang makinabang at tiyaking mapapanatili ang pagbebenta ng P20 per kilo na bigas hanggang sa June 2028.

Bilang tugon ay dadagdagan na ng NFA ang mga truck nito at palalawigin ang storage at drying capacity upang makabili ng mas maraming palay mula sa mga magsasaka. (DDC)