Japanese Language Centers na sangkot sa illegal recruitment, ipinasara ng DMW

Ipinasara ng Department of Migrant Workers (DMW) ang tatlong Learning and Language Centers dahil sa pagkakasangkot sa illegal recruitment.

Sa bisa ng Closure Orders 11, 12 at 13 Series of 2025, ipinag-utos ng DMW ang pagpapasara ng Aseanway Learning and Development Center (Aseanway), na may mga sangay sa Lapu-Lapu City, Cebu at Calumpit, Bulacan, at Iwa Language Learning Center na nasa Malolos City, Bulacan.

Ayon sa imbestigasyon, nag-aalok ang nasabing mga language center ng short Japanese language training courses na nagkakahalaga ng P15,888.

Ang aplikante na papasa sa Japanese Language Proficiency Test at Skilled Test ay irerekomenda ng mga language center sa mga partner recruitment agencies sa Maynila para makapagtrabaho sa Japan bilang mga farmer, factory worker, welder, o teacher, na may alok na sahod mula P50,000 hanggang P70,000.

Ilalagay sa DMW List of Persons and Entities with Derogatory Record ang Aseanway at Iwa Language Center, pati na rin ang mga opisyal ng mga ito.

Sila ay mahaharap din sa kasong illegal recruitment.

Ito na ang pang-12 na JLC na pinasara ng DMW simula 2024. (DDC)