Babaeng nagbebenta ng pekeng driver’s license at iba pang gov’t IDs aresto ng PNP

Inaresto ng mga tauhan ng Philippine National Police-Anti-Cybercrime Group (PNP-ACG) ang isang babaeng sangkot sa paggawa at pagbebenta ng pekeng government identification cards, kabilang ang driver’s license.

Ayon kay Land Transportation Office (LTO) Chief, Assistant Secretary Atty. Vigor D. Mendoza ikinasa ang operasyon matapos makatanggap ng ulat ng talamak na bentahan ng pekeng government IDs sa Valenzuela City, particular ang PWD ID.

Nag-aalok ang babaeng suspek ng paggawa at pagbebenta ng ID sa pamamagitan ng social media at iba pang online platforms.

Sa isinagawang surveillance, natuklasan na kabilang sa ibinebenta nito ay ang pekeng driver’s license at iba pang dokumento mula sa LTO.

Ikinasa ang joint operation ng mga tauhan ng PNP-ACG, Persons with Disability Affairs Office (PDAO) at LTO na nagresulta sa pagkakaaresto sa 29-anyos na suspek.

Mahaharap ang babae sa kasong Falsification by private individual and use of falsified documents at paglabag sa Cybercrime Prevention Act of 2012. (DDC)