Comelec target makapag-proklama ng mga nanalong Senador sa Sabado

Nakatakdang mag-resume ngayong araw ang National Board of Canvassers (NBOC) ng Commission on Elections (Comelec) para umpisahan ang canvassing ng boto para sa senatorial at party-list elections.

Unang ica-canvass ayon kay Comelec Chairman George Erwin Garcia ang mga boto mula sa local absentee voting (LAV).

Tinataya aniyang aabot sa 51,000 na boto na meron ang LAV.

Kapag natapos aniya ng NBOC ang canvassing ng LAV maaaring mag-suspinde muna ng sesyon ng NBOC.

Matapos ito ay maghihintay ang Comelec na may mai-transmit na resulta mula sa Provincial Board of Canvassers at City Board of Canvassers na nakatapos na sa kanilang canvassing.

Maaari aniyang bumalik anumang oras ang sesyon ng NBOC kapag may natanggap nang resulta mula sa Provincial Board of Canvassers o City Board of Canvassers

Ayon kay Garcia, posibleng sa Sabado, May 17 ang pinakamaaga na makapagpoproklama ang Comelec ng mga mananalong Senador. (DDC)