Dagdag na silid-aralan makatutulong din para sa mas maayos na proseso ng pagboto – Sen. Allan Cayetano

Ngayong hapon ng Lunes bumoto na rin si Senator Allan Peter Cayetano sa Cipriano P. Sta Teresa Elementary School, Bagumbayan sa Taguig City.

Dumaan sa tamang proseso ng pagboto si Senator Allan Peter kung saan umabot lamang sa halos 30 minuto.

Ipinapaabot naman ng senador ang kanyang pasasalamat sa mga bumubuo ng election body dahil sa maayos na pag papatupad ng eleksyon ngayong araw

Samantala hihilingin ni Senator Alan Peter sa Department of Public Works and Highways (DPWH) para sa karagdang pagpapatayo ng eskwelahan at mga silid-aralan upang mas maginhawa ang pag-aaral ng mga estudyante.

Bukod dito, ang mga itatayong bagong pasilidad ay karagdagang magagamit sa ganitong halalan sa hinaharap upang mas lalong kumbinyente at maayos ang pagboto ng mga residente.

Hinimok din ng senador ang gobyerno na magsagawa ng mga reporma upang maging mas epektibo at makatao ang proseso ng pagboto, lalo na para sa mga guro na nagsisilbing mga poll worker.

“‘I-simplify’ lang talaga: more schools, more teachers, more machines, and less hours,” pahayag ni Cayetano sa isang interview matapos bumoto.

Iminungkahi ng senador na bawasan ang oras ng pagboto mula alas-7:00 ng umaga hanggang 5:00 ng hapon basta’t may sapat na silid-aralan at mga tauhan.

“It really takes a toll on their (teachers’) health. Alas-singko ng umaga, nandito sila, nagpe-prepare na, hanggang matapos ang mga bumoboto at magbibilang pa,” wika niya.

Ayon sa senador, maraming guro ang halos hindi na natutulog dahil nagtatrabaho sila mula madaling araw hanggang hatinggabi.

“Halos 24 oras na hindi mo pinatutulog ‘yung mga teachers. ‘Di naman sundalo ‘yung mga ‘yan, nasanay [na tayo] sa ganoon,” dagdag pa nito.

Binigyang diin din nito ang patuloy na pagbibigay ng prayoridad sa mga senior citizens, buntis, at PWDs sa mga unang oras ng pagboto.

“Y’ung 7 to 9 a.m., o kung gagawin nating 6 to 8 a.m., iyon muna ‘yung mga priority katulad ng senior citizens, mga buntis, at PWDs,” wika niya.

Bagaman kinikilala niya ang mga pagsulong sa teknolohiya at sa bilangan ng mga balota, sinabi ni Cayetano na patuloy pa rin ang mga logistical problems, tulad ng mga technical glitches at matagal na pila sa mga voting centers.

“Inabot ko pa na dalawa hanggang tatlong araw bago dalhin sa munisipyo ang mga balota… So having more schools, more teachers, being more tech-savvy, and having more machines — ’yan ang ilang bagay na puwede nating gawin para maging maayos ang pagboto,” pahayag pa ng senador. (Bhelle Gamboa)