Poll watchers na nakuhanan ng video na tumutulong sa pag-shade ng balota, mananagot sa batas ayon sa Comelec

Tiniyak ng Commission on Elections (Comelec) na mananagot ang mga poll watchers na tumutulong sa pag-shade ng balota ng mga botante.

Kasunod ito ng viral video sa Facebook kung saan nakita ang dalawang poll watchers na sila mismo ang mayhawak ng balota at pen at sila ang nagse-shade sa balota ng dalawang botanteng senior citizen.

Ayon kay Comelec Chairman George Erwin Garcia, nangyari ito sa isang polling precinct sa Abra.

Paalala ni Garcia sa mga botante, walang ibang pwedeng humawak at magsagot sa kanilang balota.

Ang mga senior citizen na kailangan ng tulong ay maaaring tulungan ng kanilang kasama.

Kung wala naman silang kasama sa pagpunta nila sa polling precinct, ang mga miyembro lamang ng Board of Election Inspectors (BEIs) ang pwedeng umasiste sa kanila.

Ayon kay Garcia, bawal na bawal na tumulong sa pag-shade ang mga poll watcher.

Tiniyak ni Garcia na mananagot sa paglabag sa election law ang dalawang watcher na nakuhanan sa video. (DDC)