Matinding init ng panahon may epekto din sa performance ng ACMs

May epekto din ang matinding init ng panahon sa performance ng Automated Counting Machines (ACMs).

Ayon kay Commission on Elections (Comelec) chairman George Erwin Garcia, may insidenteng naitala na uminit ang makina at nagluluwa ito ng balota.

Bagaman hindi naman nasisira, nagdudulot ito ng pagbagal sa proseso ng botohan at humahaba ang pila sa mga polling precinct.

Sa isang polling precinct sa New Era Elementary School nagpadala na lamang ang Comelec ng contingency machine para mapalitan ang umiinit na makina.

Sa Tanauan City sa Batangas, dalawang makina din ang pinalitan dahil nagre-reject ng balota bunsod ng pag-init nito.

Dahil matindi talaga ang init ng panahon ngayong araw, hinikayat ni Garcia ang mga botante na magbaon ng tubig sa kanilang pagboto.

Hiling din ni Garcia sa mga botante ang pagkakaroon ng mahabang pasensya dahil may mga polling places talaga na mahaba na ang pila ng mga boboto. (DDC)