COMELEC wala pang naitatalang major technical issues sa nagpapatuloy na botohan sa buong bansa

WALA pang naitatalang major technical issues ang Commission on Elections (Comelec) sa nagpapatuloy na proseso ng botohan sa buong bansa.

Sa panayam sinabi ni Comelec Chairman George Erwin Garcia na ilang oras matapos magbukas ang botohan nagsagawa ng pulong ang mga regional director ng Comelec para magbigay ng update sa sitwasyon sa kani-kanilang nasasakupan.

Ayon kay Garcia batay sa average, kayang makatapos bumoto ng isang botante ng hindi lalagpas sa tatlong minuto lalo na kung alam na niya kung sino ang kaniyang mga iboboto.

Ang bilin ni Garcia sa lahat ng Regional Directors tiyaking hindi magkakaroon ng failure of elections saanmang bahagi ng bansa.

Sa Datu Odin Sinsuat sa Maguindanao sinabi ni Garcia na may naitalang mga insidente ng pananakot at pagpigil sa mga botante na makaboto.

Inalerto na aniya ng Comelec ang Armed Forces of the Philippines (AFP) at Philippine National Police (PNP) para tumulong sa lugar.

May mga lugar din sa Mindanao na nagkaroon ng delay ang pagbubukas ng polling precincts, bunsod ng ibat-ibang kadahilanan gaya ng late na pagkuha sa mga balota o late na pagdating ng poll watchers.

Samantala sa proklamasyon, sinabi ni Garcia na kayang makapagproklama ng mga mananalong kandidato sa municipal level as early as 9pm.

Kabilang dito ang mga mananalong mayor, vice mayor at mga konsehal.

Inaasahan naman na hindi tatagal ng hanggang Miyerkules ang proklamasyon sa Provincial level na kabibilangan ng mga nanalong gobernador, vice governor at board members.

Alas 3:00 ng hapon mamaya ay magco-convene na din ang national board of canvassers ng Comelec.

Umaasa ang Comelec na matatapos ang proklamasyon para sa national level o yung mga mananalong senador sa loob ng limang araw. (DDC)