Reelectionist Batangas 2nd Dist. Rep. Luistro inireklamo ng kaniyang katunggali sa Comelec dahil sa paglabag umano sa Omnibus Election Code

Sinampahan ng reklamong paglabag aa Omnibus Election Code si reelectionist Batangas 2nd District Representative Jinky Bitrics Luistro.

Sa verified complaint na inihain sa Commission on Elections (Comelec) ng complainant na si dating Cong. Raneo Abu, inireklamo nito si Luistro dahil dumalo ito sa aktibidad ng pamamahagi ng tulong pinansyal sa ilalim ng Assistance to Individuals in Crisis Situation (AICS) na ginawa kasabay ng ilang campaign activities sa Batangas.

“On two separate occasions during the official campaign period, and in the course of scheduled campaign activities, Jinky Bitrics Luistro, a candidate for public office, made public appearances during the distribution of the government financial assistance, AICS,” nakasaad sa reklamo ni Abu.

Si Abu ay makakatunggali ni Luistro sa pagka-kongresista sa 2md district ng lalawigan.

Sinadya umanong isabay ang campaign events ni Luistro sa idinaos na mga pay-out at sa kaniyang mga talumpati ay binanggit niyang ang pagkakaloob ng ayuda ay bunsod ng kaniyang mga hakbang bilang mambabatas sa distrito.

Malinaw ayon kay Abu na ang aksyon na ito ni Luistro ay maituturing na Abuse of State Resources (ASR) dahil pinalalabas niya sa mga tao na siya ang dapat bigyan ng kredito sa programa ng gobyerno.

Ginamit umano ni Luistro ang kaniyang posisyon at kapangyarihan para impluwensyahan at manipulahin ang mga botante.

Sa ilalim ng election law, nagkakaroon ng ASR kung ang government manpower at resources ay nagagamit para sa partisan political activity.

Maliban dito, inireklamo din ni Abu si Luistro sa Task Force SAFE ng Comelec dahil sa posibleng paglabag umano sa Anti-Discrimination and Fair Campaigning Guidelines ng Poll Body.

Ayon kay Abu sa mga campaign rally ni Luistro ay ilang beses itong nang-red tag at binanggit ang “Abu Sayyaf” na mistula pang patungkol sa kaniya dahil ang kaniyang apelyido ay “Abu”.

Ayon kay Abu nilabag ni Luistro ang anti-discriminatory guidelines ng Comelec nang direkta siyang iugnay nito sa Abu Sayyaf na designated terrorist organization ayon sa United Nations Security Council. (DdC)