DMW tiniyak ang tulong sa OFW na namatayan ng anak matapos ang car-ramming incident sa NAIA

Tiniyak ng Department of Migrant Workers (DMW) na tutulungan nito ang Overseas Filipino Worker (OFW) na namatayan ng anak matapos ang car-ramming incident na naganap sa NAIA Terminal 1.

Ayon sa DMW, paalis sana patungong Europe ang nasabing OFW at hinatid ito sa NAIA ng kaniyang pamilya nang mangyari ang insidente.

Nagpaabot ng pakikiramay ang DMW sa pagpanaw ng kaniyang 4 na taong gulang na anak.

“The DMW deeply mourns and grieves with a Europe-bound OFW, over the death of his four-year-old daughter due to that gruesome car-ramming incident at NAIA 1 yesterday morning,” ayon sa pahayag ng ahensya.

Ang asawa ng OFW ay nasugatan sa insidente at kritikal pa ang kondisyon sa ospital.

Ayon sa DMW inatasan sila ni Pangulong President Ferdinand R. Marcos Jr. na makipag-ugnayan sa Department of Transportation (DOTr) at New NAIA Infra Corporation (NNIC) para sa karampatang tulong na maipagkakaloob sa OFW.

Kabilang dito ang pagbibigay ng tulong sa pagpapagamot ng nasugatan niyang asawa at ina.

Tutulong din ang DMW para maipaliwanag sa employer ng OFW kung bakit hindi ito agad makababalik sa kaniyang trabaho. (DDC)