DOTr pinagpapaliwanag ang Cathay Pacific sa umano’y insidente ng passport mishandling sa Cebu Airport

Pinagpapaliwanag ng Department of Transportation (DOTr) sa pamamagitan ng Civil Aeronautics Board (CAB) ang Cathay Pacific hinggil sa umano ay insidente ng passport mishandling na naging dahilan kaya hindi nakaalis ang isang pasahero sa Mactan-Cebu International Airport noong nakaraang linggo.

Ayon sa incident report ng CAB, pasakay sana ang 65-anyos na pasahero sa Flight CX948 patungong Dubai noong Apr. 24.

Gayunman, sa check-in process napunit umano ang pasaporte ng pasahero habang hawak ito ng airline staff dahilan para ituring itong unusable at invalid for boarding.

Hindi rin umano nagbigay ng anumang paliwanag ang airline staff sa nangyari at sa halip ay patuloy na ipinroseso ang ibang pasahero.

Inatasan na din ni Transportation Secretary Vince Dizon ang lahat ng airlines na tiyaking walang magaganap na intentional tampering ng mga pasaport sa lahat ng Paliparan. (DDC)