Rizal 4th Dist. Rep. Nograles hiniling kay Pang. Marcos na sertipikahang urgent ang Wage Hike Bill

Kasabay ng pagdiriwang ng Labor Day, hiniling ni Rizal 4th Dist. Rep. Fidel Nograles kay Pangulong Ferdinand Marcos Jr. na sertipikahang urgent ang Wage Hile Bill.

Ayon kay Nograles ang paggunita sa Labor Day ay magsisilbing paalala sa patuloy na dinaranas ng mga manggagawa na Kahit anong kayod ay kapos pa rin ang kinikita sa pang-araw araw na pangangailangan.

Sinabi ni Nograles na mahalagang masertipikahang urgent ng pangulo ang panukala para agad na itong maipasa ng mga mambabatas.

Sa sandaling mag-resume kasi aniya ang sesyon ng Kamara sa Hunyo, mayroon lamang itong anim na araw o mula June 2 hanggang 14 para magdaos ng mga sesyon at pagdinig.

Sa bersyon ng Mababang Kapulungan, nakasaad sa panukalang batas ang pagkakaloob ng P200 daily wage increase para sa mga minimum wage earners.

Aprubado na ito sa ikalawang pagbasa ng Kamara.

“Makabuluhang mensahe po ang pag-sertipika bilang urgent ng wage hike bill para sa mga minimum wage workers natin, na magpapahiwatig na isinaalang-alang ng pamahalaan ang kapakanan ng mga manggagawa,” ayon kay Nograles.

Kung magagawang maipasa ng Kamara sa 3rd at final reading ang wage hike bill bago matapos ang 19th Congress, agad na mapaplantsa ng dalawang kapulungan ang mga pagkakaiba sa kani-kanilang bersyon sa bicameral conference committee.

Sa ilalim ng bersyon ng Senado na naipasa na noong 2024, ipinapanukala ang P100 daily wage hike. (DDC)