Meeting of Styles Phiippines 2025 muling nilunsad sa Taguig City

Naging matagumpay ang paglulunsad ng Taguig City Government ng kanyang tatlong araw na kapistahan ng sining at kultura na tinawag na Meeting of Styles Philippines 2025 na ginanap sa TLC Park, Laguna Lake Highway (C6 Road), Barangay Lower Bicutan nitong Abril 25-27.

Mahigit 100 na mahuhusay na graffitti artists mula sa lokal at internasyunal ang nagtipon-tipon upang ipamalas ang kani-kanilang talento, husay, at malikhaing pagpipinta ng murals, art zones, pop-up gallery exhibits, at sinabayan pa ng magagandang pagtatanghal ng musika.

Bukod sa murals, naging buhay na buhay din ang selebrasyon sa saliw at ritmo ng musika ng mga nangungunang local musicians sa pagtatanghal sa entablado na tumutugma naman sa enerhiya at diwa ng sining.

Ito na ang ikatlong taon ng Taguig City sa makabuluhang pagsasagawa ng kanyang Meeting of Styles Philippines.

Pinasalamatan at pinahalagahan naman ni Mayor Lani Cayetano ang masiglang paglahok ng local at international artists na nagbahagi ng kanilang oras at panahon, kahanga-hangang talento at pagiging tunay na malikhain sa sining na talagang nagbigay ng tagumpay sa kaganapang ito . (Bhelle Gamboa)