Private school pinagbabayad ng Korte Suprema sa pamilya ng batang nabiktima ng bullying sa loob ng paaralan

Pinapanagot ng Korte Suprema ang isang pribadong paaralan dahil sa kapabayaan kaugnay ng isang insidente ng pambu-bully na humantong sa pananakit ng isang estudyante sa klase noong 2007.

Sa isang desisyon na isinulat ni Associate Justice Mario V. Lopez, nakita ng Second Division ng Korte Suprema na nabigo ang Mother Goose Special School System, Inc. (Mother Goose School) na tugunan ang insidente na kinasangkutan ng tatlong grade school students.

Sa isang computer class, paulit-ulit na sinuntok ng dalawang estudyante ang kaklase habang nasa comfort room ang guro.

Matapos ito ay walang naging aksyon ang paaralan sa kabila ng pagsumbong ng biktima sa kanyang mga guro.

Hindin rin pinansin ng paaralan ang reklamo ng mga magulang ng biktima na nag-udyok sa kanila na maghain ng pormal na kahilingan para sa isang imbestigasyon.

Sa huli ay napagpasyahan ng paaralan na ang insidente ay “panunukso” o “rough play” lamang at walang ginawang disciplinary action laban sa mga sangkot na estudyante.

Nagsampa ng reklamo ang mga magulang ng biktima para papanagutin ang paaralan, sa mga guro, at sa mga ama ng mga sangkot na estudyante.

Sa pasya ng mababang korte, sinabi nitong may pananagutan ang paaralan at ang teacher-in-charge dahil sa kanilang tungkulin na protektahan ang mga mag-aaral sa oras ng pasukan.

Pinagtibay ng Court of Appeals (CA) ang desisyon ng RTC hinggil sa pananagutan ng eskwelahan pero idineklara nitong walang pananagutan ang guro dahil absent ito nang mangyari ang insidente.

Ayon sa Korte Suprema, tama ang naging desisyon ng CA at binigyang-diin na ang mga paaralan ay may kontraktwal na obligasyon na tiyakin ang isang ligtas na kapaligiran sa pag-aaral.

Dagdag pa nito, dapat panatilihin ng mga paaralan ang kapayapaan at kaayusan sa loob ng kanilang lugar, at maging sa labas ng campus sa mga aktibidad ng paaralan.

Napag-alamang naging pabaya ang Mother Goose School dahil sa kawalan nito ng wastong protocol, pagkabigo na ipaalam kaagad sa mga magulang ng biktima ang nangyari, at mga kamalian sa pagsisiyasat nito.

Inatasan ng Korte Suprema ang Mother Goose School na bayaran ang mga magulang ng biktima ng P650,000.00 bilang danyos at bayad sa abogado. (DDC)