Rizal, Cagayan pinag-aaralang isailalim sa Comelec Control matapos ang pagpatay sa reelectionist mayor

Mariing kinondena ng Commission on Elections (Comelec) ang pagpaslang sa mayor ng Rizal, Cagayan.

Hiling ng Comelec sa mga otoridad, arestuhin at papanagutin ang nasa likod ng pananambang.

Nanawagan si Comelec Chairman George Erwin Garcia sa Philippine National Police (PNP) na madaliin ang pagdakip sa mga suspek.

Aniya, hangga’t walang naaaresto ay hindi mapapanatag ang publiko na magkakaroon ng payapa at tahimik na halalan.

Maituturing aniya na seryosong insidente ang nangyari lalo at ang biktima ay nakaupo pang mayor sa bayan at isang reelectionist.

Sa ngayon sinabi ni Garcia na pinag-aaralan nang ilagay sa Comelec Control o sa Red Category Area ang bayan ng Rizal sa Cagayan. (DDC)