Digital insurance payouts para sa mga magsasaka inilunsad ng GCash at PCIC

Inilunsad ng leading finance application na GCash at ng Philippine Crop Insurance Corporation (PCIC) ang digital payout disbursements sa mga magsasaka upang mapabilis at maging ligtas ang kanilang digital insurance payouts.

Lumagda ang GCASH at PCIC sa memorandum of agreement na layong mapabilis ang paghahatid ng PCIC ng insurance claims sa mga magsasaka sa iba’t ibang panig ng bansa.

Sa ilalim ng programa, gagamit ng digital disbursements at real-time payouts gamit ang GCash upang mabawasan ang paggamit ng pisikal na cheke.

Ayon kay PCIC business development at marketing manager Israel Dela Cruz, matagal ng misyon ng kanilang kompanya na magkaroon ng epektibong distribusyon ng payouts sa mga magsasaka at mangingisda sa mga malalayong lugar ng Pilipinas.

Kasama rin sa nasabing kolaborasyon ang pagdaraos ng “Digital Financial Literacy Caravan” upang matulungan ang mga magsasaka na magkaroon ng akses sa mga digital services ng GCash tulad ng savings, loans, at investments.

Nagsimula ang nasabing caravan ngayong Abril kung saan naabot nito ang mahigit 300 na mga magsasaka sa Candaba, at 200 sa San Rafael.

Ayon naman kay GCash Manager for Public Sector National Government Accounts Alda Lou Cabrera, dahil sa nasabing programa hindi na maghihintay ng matagal ang mga magsasaka para makuha ang kanilang physical checks sa kanilang insurance claims. (DDC)