Halos P300K na halaga ng shabu nakumpiska sa Muntinlupa City

Dalawang katao ang naaresto sa gitna ng anti-illegal gambling at anti-drug operations na isinagawa ng mga tauhan ng Alabang Police Sub-station ng Muntinlupa City Police Station na nagresulta ng pagkakumpiska ng hinihinalang shabu na nagkakahalaga ng P272,000.00, sa Sitio San Roque, Barangay Alabang sa lungsod.

Batay sa ulat namataan ng mga nagpapatrulyang otoridad ang mga suspek na sina alyas Yayang, 21-anyos,tinukoy na Street Level Individual (SLI) at alyas Pipe, 40-anyos, na ilegal na nagsusugal ng cara y cruz sa lugar, na sanhi ng kanilang agarang pagkaaresto.

Nakumpiska ang halagang P720.00 na pusta sa sugal, barya na ginamit bilang pangara, at 40 na gramo ng umano’y shabu na nakalagay sa coin purse.

Nasa kustodiya ng pulisya ang dalawang suspek na sasampahan ng paglabag sa Presidential Decree 1602 (Illegal Gambling) habang karagdagang kaso sa Comprehensive Dangerous Drugs Act of 2002 laban kay alyas Yayang.

Lumitaw sa beripikasyon na si alyas Pipe ay may dating criminal records dahil sa kasong paglabag sa RA 9165 noong Hulyo 2015 at Marso 2018 habang wala namang record si alyas Yayang.

“This operation is a clear message to those who continue to engage in illegal activities, you will be found, you will be caught, and you will face the full force of the law. We’ll remain relentless in our campaign to rid our communities of criminal elements and protect the lives and future of our citizens. The public can rest assured that the Southern Police District will not waver in its commitment to peace, order, and justice,” pahayag ni BGen Joseph R. Arguelles, Acting District Director ng Southern Police District. (Bhelle Gamboa)