Mahigit 2 milyong pasahero bumiyahe sa mga pantalan nitong nagdaang Holy Week

Nakapagtala ang Philippine Ports Authority (PPA) ng mas mataas na bilang ng mga pasaherong bumiyahe sa mga pantalan nitong Holy week 2025 kumpara noong nakaraang taon.

Ayon sa datos ng PPA, umabot sa 2,291,666 ang naitalang pasahero sa mga pantalan mula Apr. 12 hanggang 20, 2025 na mas mataas ng 37.14% kumpara sa naitalang mga bumiyaheng pasahero noong 2024 Holy Week na umabot sa 1,670,984.

Ayon kay PPA General Manager Jay Santiago, ang pagtaas ng bilang ng mga pasahero ay maaaring dahil natapat din ang Holy Week sa Summer Vacation.

Nakatulong din ayon kay Santiago ang kanilang “PPAsyalTayo campaign” kung saan ipinapakita ang mga tourist destinations na accessible sa mga pantalan.

Kabilang sa mga pantalan na nakapagtala ng pinakamataas na bilang ng mga pasahero ay ang PMO Batangas, PMO Panay/Guimaras, PMO Mindoro, PMO Negros Oriental/Siquijor, at PMO Bohol.

Tiniyak naman ng PPA na patuloy na sosolusyonan ang mga problemang naranasan nitong nagdaang Holy Week kabilang ang mahabang pila sa ilang terminals. (DDC)