Dalawang buwaya boluntaryong isinuko sa mga otoridad ng isang residente sa Navotas
Tumulong ang mga kinatawan ng DENR Metropolitan Environmental Office North (MEO-North) sa mga Manila Zoo personnel sa pagsagip ng dalawang Saltwater Crocodiles sa Barangay San Roque, Navotas City.
Ang mga buwaya ay boluntaryong isinuko ng may-ari dito na umaming walang kaalaman sa batas na nagbabawal sa pag-aalaga ng wildlife nang walang permit.
Ang babaeng buwaya ay may habang 4 na talampakan habang ang lalaking buwaya ay tinatayang 8 talampakan ang haba.
Sa kabila ng masikip na kulungan, matagumpay na nailipat ang dalawang buwaya sa Manila Zoo kung saan sila ay sasailalim sa masusing pangangalaga at monitoring.
Ang Saltwater Crocodile, na kabilang sa parehong species ni Lolong ay itinuturing na pinakamalaking nabubuhay na uri ng reptiles sa mundo.
Bagaman itinuturing na Least Concern sa IUCN Red List, patuloy itong nahaharap sa mga banta tulad ng urbanisasyon at habitat loss. (DDC)
