“Fish Kill” naitala sa Lakeshore Area sa Taguig City

Nakapagtala ang Lake and River Management Office (LRMO) ng serye ng fish kill o pagkamatay ng mga isda sa bahagi ng Lakeshore ng Lungsod ng Taguig sa Laguna Lake.

Ito ay naitala sa pagitan ng Abril 1 hanggang Abril 16, 2025.

Ayon sa Taguig City LGU, umabot sa 1,620 na kilo ng patay na isda ang nakolekta at na-dispose nang maayos upang maiwasan ang epekto nito sa kalikasan at kalusugan ng publiko.

Ilan sa tinitignang dahilan ng fish kill ang mga sumusunod:

* Biglaang pagbaba ng dissolved oxygen sa tubig
* Mataas na temperatura ng tubig
* Labis na pagdami ng algae
* Sobrang dami ng isda sa mga fish pens
* Polusyon o paglabas ng maruming tubig mula sa kabahayan o agrikultura

Dahil sa insidente, sinabi ng Taguig LGU na maaaring magkaroon ng masangsang na amoy sa paligid dahil sa natural na proseso ng pag-decompose ng mga patay na isda, na naglalabas ng hydrogen sulfide at ammonia.

Iniutos na ng Pamahalaang Lungsod ang araw-araw na pangongolekta at wastong pagtatapon ng mga patay na isda at pagmomonitor ng kalidad ng tubig sa lawa.

Nanawagan din ito sa mga fish cage operators na iwasan ang overstocking upang hindi na lumala ang sitwasyon. (DDC)