Comelec naglabas ng panibagong “show cause order” laban kay Pasig City Congressional Candidate Christian Sia matapos tawaging “mataba” ang kaniyang staff
Nagpalabas ng panibagong show cause order ang Commission on Elections (Comelec) kay Pasig City congressional candidate Christian “Ian” Sia.
Kasunod ito ng kaniyang pahayag patungkol sa physical appearance ng kaniyang assistant.
Ginawa ni Sia ang pahayag habang idinedepensa ng sarili matapos ng kontrobersiyal na pahayag sa mga single parent.
Tinawag ni Sia ang kaniyang staff na ayon sa kaniya ay “mataba”.
“….Ahhindi, nung nakuha jka na ni Eweng, mataba ka na. Nung magkasama pa lang tayo, ito na ang katawan ni Jaja. Give or take. Ilabas mo lang yung picture. Huwag na tayong magtalo ito sa harap. Ang point ko ho. Iyan po ba ang magiging staff ng manyak? Di ho.” ayon kay Sia.
Ayon sa Comelec, posible itong paglabag sa RA 11116 o Anti-Discrimination and Fair Campaigning Guidelines for Purposes of the May 12 2025 National and Local Elections and BARMM Parliamentary Elections.
Binigyan lamang ng Comelec si Sia ng tatlong araw para magpaliwanag.
Ito na ang ikalawang show cause order ng Comelec kay Sia. (DDC)
