Babaeng pasahero sa Mactan-Cebu Airport arestado matapos mahulihan ng bala sa sa backpack

Naaresto ng mga tauhan ng PNP Aviation Security Group (AVSEGROUP) ang papaalis na pasahero sa MACTAN-CEBU International Airport (MCIA) matapos mahulihan ng mga bala.

Nakita ang apat na bala sa dalang backpack ng 47-anys na HR Manager na residente ng Lapu-Lapu City.

Pasakay ng eroplano ang babaeng pasahero patungo ng Tacloban.

Sa ikinasang final screening sa checkpoint ng mga tauhan ng Office for Transportation Security (OTS), nakita ang hugis bala sa backpack ng pasahero dahilan para magsagawa ng manual inspection.

Bigo ang pasahero na magpakita ng dokumento na magpapatunay na otorisado ang pagdadala niya ng mga bala.

Mahaharap siya sa kasong paglabag sa Republic Act No. 10591 o Comprehensive Firearms and Ammunition Regulation Act at COMELEC Gun Ban. (DDC)